Minggu VIII Kenca Trinitatis – 75 Tahun GBKP Njayo
Invocatio: “Asum anak-anak denga aku, pengeranangku, perukurenku, ras pengertinku bali ras anak-anak. Tapi kenca aku dewasa kutadingken kerina biak-biak e” (1 Korinti 13:11)
Ogen: Pilipi 4:10-20 (Tunggal)
Khotbah: Jakup 1 : 2-4 (Tunggal)
Thema: Kristen Si Dewasa
Ogen: Pilipi
4:10 Mbelin kal keriahen si kugejapken i bas geluhku erkiteken persadanku ras Tuhan. Kenca bage dekahna, lit ka kesempatenndu sekali nari ncidahken maka iperdiatekenndu kap aku.
4:11 Labo maksudku maka lanai aku iperdiatekenndu, saja lanai kin lit kesempatenndu ncidahkenca. Janah si enda kukataken labo erkiteken kugejap maka aku lanai iperdiatekenndu; sabap aku enggo erlajar encukupken alu kai si lit i bas aku.
4:12 Kueteh nge kai ertina nggeluh i bas kekurangen, janah kai ertina nggeluh i bas kelebihen. Enggo dat aku rahasiana, seh maka i ja gia ntah katawari gia, malem ateku subuk paksa aku besur bage pe paksa melihe, subuk paksa aku kelebihen bage pe paksa kekurangen.
4:13 Ngasup aku ngalaken kerina keadan erkiteken kuasa si ibereken Kristus man bangku.
4:14 Tapi mehuli kal perbahanenndu nampati aku, asum aku i bas kiniseran.
4:15 Kam o kalak Pilipi, ietehndu kal kap maka asum kutadingken Makedoni, asum tangtangna kuberitaken Berita Si Meriah kam ngenca perpulungen si nampati aku. Kam ngenca ikut ngenanami untung bage pe rugingku.
4:16 Asum perlu aku penampat i Tesalonika la sekali ngenca ikiremkenndu penampat.
4:17 Labo saja ateku ngaloken pemere-pemere e, tapi si kuarapken e me ngidah perkiran untungndu itambahi.
4:18 Enda dage tandana i bas aku nari maka enggo kualoken kerina si enggo iberekenndu man bangku. Janah lebih pe asa si kuperluken. Genduari enggo cukup kerina keperlunku, e me kenca ibaba Epaproditus kerina pemere-pemerendu. Pemere-pemerendu e jadi sada persembahen si merim man Dibata, persembahen si ialokenNa dingen si ngena ateNa.
4:19 Dibatangku si simpar alu kebayaken si lit i bas Kristus Jesus mereken kerina keperlunndu.
4:20 Terpujilah Dibata Bapanta seh rasa lalap! Amin.
Khotbah: Jakup
1:2 O senina-seninangku, sangap min iakapndu bandu adi reh erbage-bage percuban ngkenai kami.
1:3 Sabap ietehndu adi kinitekenndu tetap tahan ngalaken percuban-percuban e, kam jadi kalak megenggeng.
1:4 Tetaplah kam megenggeng seh kinigenggengenndu serta, maka kam dewasa i bas kai-kai pe, dingen la kekurangen.
I. Perlebe
Minggu enda iajuk kita kerina warga GBKP secara menyeluruh guna merenungken, mengevaluasi dirinta bagepe secara lembaga uga kinata kecibalta kenca kita enggo njayo i bas pe 75 tahunken enda. Tentu kalak si enggo njayo iarapken banci mpekena-kena dirina seh maka ngasup mandiri secara dana bagepe pengelolaan (Management). Kemandirin secara totalitas kegeluhen enda me sinimaksudken “Kedewasan”. Ngidah sie tentuna kita lanai minter puas (gampang puas) kerna status keKristenenta erkiteken si ngaku Kristen mungkin nterem tapi Kristen si Dewasa lenga tentu.
Arah bahan renungenta minggu enda, iarapken banci sidatken mulihi pengangkan si payo kerna status kekristenenta, si idah dalan guna meningkatken kedewasannta seh maka teridah perubahan si signifikan i bas ertambahna umur kinitekenta.
II. Pebagesi Kata Dibata
2.1. Bahan Khotbah
1:2 O senina-seninangku, sangap min iakapndu bandu adi reh erbage-bage percuban ngkenai kami.
Selain teologia Jakup enda, Lit piga-piga ayat bas Padan Si Mbaru si menekanken pentingna mengubah cara pandang ras cara penerimanta nangdangi “Percuban” (Yun. Πειρασμοις, baca: peirasmois), eme:
- Roma 5:3 “Janah labo terjeng je saja, tapi megah pe siakap i bas kiniseranta, sabap sieteh maka arah kiniseran turah saber ate.”
- 1 Petrus 1:6 “Ermeriah ukurlah kerna si enda, aminna pe genduari kam arus erceda ate i bas paksa si kentisik erkiteken erbage-bage percuban si inanamindu.”
Teologia enda umumna igelari “paradoks” ntah pe sada pendapat si ertentangen ras pendapat umum. Erkiteken labo lit sekalak pe jelma si menganggap maka “Percuban” eme sada hal si sangap, megah ntahpe keriahen ukur. Situhuna Jakup labo mindo gelah kita ermeriah ukur i bas “nanam” kiniseran e (Masokisme berarti senang menderita. Kalak si masokis merincuh ia isakiti erkiteken si e mereken kesenangen man bana. Perilaku enda pe terjadi i bas piga-piga aliren Kristen si menyimpang alu niksa ras ngelukai dirina alu tujun kesenangen ras menganggap banci ngenanami kiniseran Tuhan Jesus sanga ndatken kiniseran ope isalibken) , tapi ermeriah ukur erkiteken perayaken ndatken i balik kiniseran e. Ermeriah ukur erkiteken ndatken kesempaten mengembangken kinigenggengen (ketekunan) janah seh maka terbentuk karakter Kristen si Dewasa.
Ermeriah ukur bagi sekalak siersikap guna ertanding. Sekalak Atlit Binaragawan ngasup megenggeng nahanken kiniseran ibas makeken erbage-bage alat beban erkiteken fokusna la i bas kiniseran e tapi perayaken i balik proses e.
Cara pembabaita erbage-bage hal pe menentuken kel ku hasilna. Adi kita tertekan i bas ndalani sada hal, tentuna menutup ruang kreatifitas bagepe pemaksimalen kinerjanta. Bagepe i bas ndalani ntahpe ngalaken percuban, pentingkel nina Jakup kita merasa “Sangap” (Ind. Kebahagiaan - Ing. Joy/Glad), erkiteken cara pembabaita si bagenda erbahanca kita lebih ngelakoken hal-hal si positif. Tapi sebalikna adi si anggap percuban sada ukumen, keliahen ntahpe kegagalen mbabai kita rukur negatif, nalahken diri, kalak bagepe Tuhan, piahna kita ndabuh ku sikap pasif.
2.2. Bahan Ogen
Penggejapen Paulus selaku pengikut Kristus si cukup puas ngenanami percuban-percuban bagepe kiniseran, kengasupenna megenggeng ras belinna keriahen ukurna i bas ngalaken si e kerina sada ngenca alasenna eme “erkiteken persadanna ras Tuhan” (ayat 10).
Konsep Dewasa Menurut Paulus i bas Pilipi eme:
1. La kurang perhatian (bnd. Ayat 11)
2. “Enggo” erlajar encukupken alu kai si lit i bas aku (Ayat 11)
3. Meteh kai erti nggeluh i bas kekurangen janah nggeluh i bas kelebihen (Ayat 12)
4. Ngasup ngalaken kerina keadan = erkiteken kuasa Kristus (Ayat 13)
Si empat i datas banci si kembangken masing-masing rikut ras contoh-contoh si sue ras kesaksin geluhta. Janah pengalamen Paulus enda pe banci sijadiken tolak ukur guna nggargari kecibal geluhta segelah lit evaluasi diri.
2.3. Invocatio
Simbedaken antara anak-anak ras dewasa menurut Paulus eme persoalen BIAK. Biak anak-anak penting i I TADINGKEN!!! Biak-biak sinimaksudken Paulus eme:
1. Pengerana (Yun. ελαλουν – elaloun)
La sitik kita manusia ianggap kekanak-kanaken hanya kerna cara pengeranata
2. Perukuren (Yun. εφρονουν – ephronoun)
Situhuna memang sumber pengerana bagepe lagu langkah eme carata rukur, janah carata rukur itentuken oleh koleksi-koleksi pikirenta (sumber-sumber). Tuhan Jesus mengkonfrontasinen “Perukuren Manusia” ras “Perukuren Dibata” sebagai tanda kedewasan iman.
(Bnd. Matius 16:23 Itulihken Jesus, jenari nina man Petrus, "Laweslah i bas Aku nari, o, Iblis! Isidingindu kap Aku. Perukurenndu perukuren manusia, labo perukuren Dibata.")
3. Pengertinku (Yun. ελογιζομην – elogizomên)
Kita megati fanatik ku pengertin-pengertin pengalamenta sendiri, tanpa sadar cenderung Apriori (kesimpulen-kesimpulen si la erdasar pengalaman secara objektif). Kedewasan Paulus jadi erkiteken “Pengertin-pengertinna” nai ope jumpa ras Kristus ipelimbarui jadi pengertin si mengandalken Kristus.
III. Kesimpulen
Rick C. Howard i bas bukuna “Christian Maturity” (Pendewasaan Kristen), njelasken maka lit piga-piga unsur si mengarahken kita ku kedewasaan rohani, eme: Pengendesen totalitas geluhta man Yesus Kristus, Kesetianta njadiken Pustaka Si Badia jadi Pedoman Geluhta, Ketekunen Pertotonta, Penandaita Banta i Adepen Tuhan, Penandaita Pendahin Kesah Si Badia janah siterakhir Kengasupenta Nggeluh Ersaksi Nangdangi Sekelewetta.
Unsur-unsur si i datas enda enggo teridah i bas geluh Jakup, Petrus bagepe Paulus. Kerina tantangen geluh termasuk percuban, ipengasup kita guna ndalanisa alu benar adi cara pandangta, perukurenta ipelimbarui, seh maka makna kehadiren percuban lanai jadi sada kebiaren ntahpe kearun tapi jadi sada kesangapen man kalak sitek ras sierpengarapen man Tuhan Jesus.
Tidak ada komentar:
Posting Komentar