KEPUTUSEN SIDANG KLASIS

             KEPUTUSEN SIDANG KLASIS

                GBKP LAU BALENG PE 38 TAHUN 2016    

     Kamis, 22 September  2016 i Runggun Lau Baleng

A. BIDANG PEMBINAAN & UMUM.

1.         Sidang Klasis si XXXIX

Kerna ingan entahpe tuan rumah Sidang Klasis si XXXIX ken bulan Maret 2017 eme i Runggun Kinangkong.

2.         Data Statistik ras SIAJ

Hasil percakapen bagepe keputusen Sidang Klasis kerna penanganen input Data Statistik ras SIAJ runggun si lenga dung, i endesken ku Klasis gelah itangani anak Permatanta janah runggun ngelitken danana.

3. Utusan Runggun ku SKMS Oktober 2016

- Rg Lau Renun

- Rg Mbalno

- Rg Perbulan

- Rg Lau Njuhar 1

- Rg Marlias

4. Aset  Gereja

Sue ras percakapenta i bas piga-piga kesempaten bagepe i bas Sidang Klasista, maka tetpalah sitindak lanjuti kerna Validitasi Status Kepemiliken Gerejanta masing-masing. Siusahaken lengkap datana, batas, ras ukurenna. Janah adi lit penghibahen arah keluarga jemaat iusahaken secepatna ban pernyataan hitam diatas putih.

5. Tukar Mimbar

Guna kelancaren Program Tukar Mimbarta perlu siperdiateken:

1.      I arapken pengkhotbah ngikuti sermon klasis gelah pesan-pesan utama banci sada persepsi

2.      Runggun-runggun bagepe siertugas iarapken enggo mbangun komunikasi seminggu ope tukar mimbar gelah lit konfirmasi si jelas guna dahinta enda

3.      Runggun-runggun si ngidah lit potensi bagepe kemauan Pertua/Diaken guna menjadi Petugas Tukar Mimbar iarapken mereken rekomendasi man Klasis

4.      Petugas sila terhubungi runggun segera melaporken ku klasis gelah idarami solusina

5.      Petugas Tukar Mimbar i bas pelayanenna mpeseh berita titipen arah Klasis (via SMS) man runggun-runggun hal-hal si ianggap penting. Berita enda banci ipeseh i bas khotbah ntahpe kenca dung kebaktin (tergantung simanpesehenken)

6. Orientasi Personalia

Orientasi Personalia ras Keluarga bagepe BPMK ilakoken i bas bulan Oktober 2016 enda.

7. Pembangunen Gereja

            1. Pemindon Runggun Bukit Makmur guna erbahan Pesta Pembangunen Gereja Secara Lokal tahun 2017 enggo ialoken i bas keputusen Sidang Klasista.

            2. Kerna Dana Pembanguen Gereja Sinodal arah geraken Rp. 2000/kk/bulan sitimai keputusen SKMS tahun enda kerna teknisna.

B.         BIDANG KOINONIA

1. Lansia

            Erkiteken seh paksa enda mayoritas runggun lenga mbentuk Pengurus Lansia Klasis, emaka iarapken kerina Runggun serius mbahas persoalen enda i bas Sidang Runggun janah secepatna mbentuk kepengurusen enda selambat-lambatna enggo ilaporken gelar-gelar pengurus e i bas Orientasi bulan November 2016.

2. Mamre

            Iarapken Mamre Klasis ngasup lebih bijaksana i bas pengelolaan keuangen bagepe prioritas program gelah lanai semakin membengkak defisit keuangen. Janah sue ras giliren, kerna pemaken Kantin Jambur Klasis iendesken ku Kategorial KA/KR janah seterusna ku Moria Klasis.

3. KA-KR

1. Program-program  si bahan KA/KR klasis harus mempetimbangken/mperdiateken program pusat ras Moderamen gelah ula terjadi Overlapping program ntahpe tabraken waktu pelaksanan.

2. Pengurus KA/KR Klasis iarapkem segera ngelaksanaken Orientasi Pelayanen guru KA/KR

4. Moria

Iarapken alu mesangat man kerina runggun-runggun arah BPM runggun gelah utang-utang siberkaiten ras Moria Klasis secepatna idungi erkiteken keuangen Moria sangat bergantung ku kelancaren penyelesaian utang-piutang enda. Ipindoken man BPM runggun gelah mereken penekanen/persinget man pengurus Moria runggun i bas sidang-sidang bagepe perjumpan perminggunta.

C. BIDANG MARTURIA

1. Integritas Serayan

Berkaiten ku pemulihen bagepe peningkaten Integritas Serayan Tuhan, iarapken man kerina runggun-runggun si ngidah bas runggunna kinata Serayanna e mbue denga si lenga sue ras panggilenna bahkan jadi batu antuken gelah erbahan program pembinaan janah erkordinasi ras Klasis.

2. Sermon

Sue ras keputusenta ras i bas Sidang Klasis maka kerina runggun wajib ngelakoken sermon. Adi perlu ban anggaren guna Pulsa BPMR gelah intensif ngiahken kerina serayan Tuhan gelah reh ku bas sermon. Guna efektifitas sermon enda banci ilakoken i rumah-rumah serayan alu pegancih-gancih (labo harus i gereja).

3. PRT

Tetap ilanjutken sue ras keputusen si enggo lewat

4. Peningkaten Pertumbuhen Jemaat

            Program-program si bernuansa kreatifitas iarapken tetap igumulken, irancang ras ilakoken bas tep-tep runggun gelah tetap lit penyegaren diluar rutinitas dahin gereja

5. PI

            Tim PI si enggo ibentuk Klasis iarapken menjajaki program si mengarah ku pemantapen keyakinen keselamaten (alu Penginjilen EE) janah kolaborasi ras meditasi guna pemantapen pengutusen.

6. Mitra Runggun

            Kerina runggun-runggun Klasis Lau Baleng tetap membangun komunikasi ras runggun-runggun si enggo reh jadi Tim PI arah Klasis Jakarta. Komunikasi sinimaksud labo terjeng litna pemindon penampat tapi saling notoken i bas pelayanen.

D.        BIDANG DIAKONIA

1. STS

             Iupayaken gelah adangen runggun berkaiten ku kemalangen secepatna/iutamaken penggalarenna janah iusahaken ipelebe utusen runggun si reh ku Kantor Klasis demi kelancaren ncidahken ate kelengta nangdangi t/s sindatken kemalangen

2. Kepesengen

Kepesengen i tetapken :

§  Kategori A            =         Rp. 300.000,-

§  Kategori B =         Rp. 200.000,-

Klasifikasi : a) Meseng keri (terbakar habis)   =         Rp. 2.000.000,- 

              b) Bongkar habis                         =         Rp. 1.000.000,-

Ibahan dana tunggu i bas Klasis gelah la terkendala i bas ngelaksanaken dahin Diakoni enda.

E.         KEUANGEN

1. Usaha Klasis

            Geraken Rp. 10.000/semester i bas evaluasinta lanai efektif i bas pelaksananna, emaka sibahan metode pendekaten simbaru alu gelar “Donatur Pelayanen” Rp. 25.000 si itujuken ku anggota jemaatta tertentu si ianggap memang layak janah nggit jadi Donatur tetapta.

2. Usaha Runggun

Tetap ilakoken bagi si enggo, janah man runggun-runggun si lenga ngelunasi usaha runggunna i bahan surat persinget jenari singetkan ku sidang runggun.

3. Persepuluhen

            Tetap igaungken bas kebaktin-kebaktinta jenari man runggun singidah lit persoalen ibas cara memahami teologia persepuluhen enda, banci erkordinasi ras Klasis guna erbahan pengelayasi baik secara formal (pembinan/seminar) bagepe cara sideban.

4. Persembahen

1. Kerina kebaktin-kebaktin termasuk kebaktin persikapen ibahan persembahenna janah isetorken bagi arusna. Kerna kebiasan si ilakoken piga-piga runggun i bas mereken ulih pelayanen man simbabaisa i bas persikapen iaturken khusus i bas sidang runggun kerna Viatikumna.

            2. Kantong Persembahen si ipedalan i bas kebatin eme 3 kantong, 2 kantong seri warnana guna kas umum janah 1 kantong siberbeda warnana guna keperlun insidentil (extra)

5. Tim Verifikasi

            Runggun singutus  jemaat potensial guna jadi Tim Verifikasi i bas Sidang Klasis si reh eme:

1.      Imanuel

2.      Kuta Buluh

3.      Renun

6. Usul-usul

Usul Emeritus

                     Erpalasken Surat  Badan Pekerja Majelis Runggun Kuta Buluh No.07/Rg-KB/2016 tertanggal 30 Maret 2016 kerna Usulen Emeritus eme:

            G e l a r                      : Agen Pinem

            Ingan/Tgl Tubuh        : Kuta Buluh,22 Oktober 1960

            Masa Kerja                 : 25 Tahun (1991-2016)

            Runggun                    : Kuta Buluh

Usul enda i baba ku bas SKMS bulan Oktober 2016 enda.

KHOTBAH GBKP MINGGU TGL. 2 OKTOBER 2016

Minggu Budaya

Invocatio : “Ercakap-cakaplah kam sapih-sapih kam alu make masmur, ende-enden pujin dingen ende-enden pertendin. Endekenlah ende-enden ras masmur man Tuhan alu ukur dem ngataken bujur” (Epesus 5:19)

Ogen : 2 Samuel 6:1-5 (Tunggal)

Khotbah : Masmur 149:1-9 (Antiponal)

Tema : LANDEK DINGEN RENDE DEM PENGATAKEN BUJUR

2 Samuel 6

6:1 Ipepulung Daud ka sekali nari tentera Israel si mbisana teremna 30.000 kalak.

6:2 E maka ibabaina kalak ndai ku Baala i Juda, gelah maba Peti Perpadanen i jenari, Peti si maba gelar TUHAN si Mada Kuasa, si ringan i babo Kerubim.

6:3 Peti Perpadanen e ibuatna i rumah Abinadap nari i das uruk-uruk e maka iamparkenna i datas sada gereta si mbaru. Si mabai gereta e Ussa ras Ahio duana anak Abinadap.

6:4 Ahio erdalan arah lebe.

6:5 Daud ras kerina bangsa Israel rende dingen landek-landek asa gegehna muji TUHAN , iikuti sora kulcapi, murdap, gendang, genta ras calacayak.

Masmur 149

149:1 Pujilah TUHAN ! Endekenlah ende-enden si mbaru man TUHAN , pujilah Ia i tengah-tengah perpulungen bangsaNa si tutus.

149:2 O Israel, meriahlah erkiteken Ia si nepa kam, rende ersuraklah, o kerina kalak Sion, erkiteken Rajandu.

149:3 Alu landek pujilah gelarNa, pujilah gelarNa, alu malu gendang dingen ngkuit kulcapi.

149:4 Ngena ate TUHAN man bangsaNa, ipehagaNa kalak si meteruk alu mereken kemenangen.

149:5 Meriahlah iakap bangsa TUHAN erkiteken kemenangenNa, dingen rende ersurak gedang-gedang nu berngi.

149:6 Pujilah Dibata alu sora megang, alu njemak pedang si ntelap,

149:7 lako naluken negeri-negeri, ras ngukum rayatna,

149:8 ngeranteken raja-rajana, ras peminpin-peminpinna alu rante besi;

149:9 guna ngukum bangsa-bangsa sue ras perentah Dibata. Enda me kap kemenangen bangsa Dibata. Pujilah TUHAN !

I. Perlebe

            Menurut Abraham Maslow (Psikolog) tiap jelma lit 5 tingkat kebutuhen kegeluhenna, eme:

1.      Kebutuhen Fisiologis (kebutuhen mutlak, adi la terpenuhi banci erbahanca jelma e mate)

2.      Kebutuhen rasa aman ras perlindungen

3.      Kebutuhen Sosial (erkade-kade)

4.      Kebutuhen ibereken penghargan

5.      Kebutuhen Aktualisasi diri (ekspresi rasa)

Tentuna setiap jelma berbeda kebiasan-kebiasanna i bas ia mengekspresiken perasanna. Perbedaan enda ipengaruhi konteks lingkungen masing-masing. Perbedan enda labo jadi permasalahen, tapi si mungkin jadi masalah eme ketika sekalak jelma mengekspresiken diri alu sila jadi kebiasan, budaya ntape identitas dasariahna. Adi sie ilakoken kemungkinen siterjadi banci saja muncul prilaku pekulah-kulah.

Adi sibaca Masmur 149, terasa kel i je kemurnin cara penembahen kalak Israel alu mengekspresiken kai-kai saja instrumen si lit i bas kebudayanna. Penyembahen ncidahken rasa sukur erkiteken enggo menang i bas peperangen ngelawan imbangna. Kemurnin enda singena ate Tuhan i bas penembahenta erkiteken ndauh i bas sifat pekulah-kulah nari.

II. Bahan Khotbah

            Masmur enda eme masmur pengajuk[1] guna nggejapken kuasa, kekelengen ras perkuah ate Tuhan si enggo icidahkenNa man bangsa Israel.[2] Penginget guna nembah ras muji Tuhan si enggo mereken kebutuhen-kebutuhen manusia baik kebutuhen fisiologis (Primer), kebutuhen rasa aman ras perlindungen arah serangen imbang-imbang Israel paksa si e, kebutuhen sosial erkiteken Tuhan enggo njadiken Israel jadi sada bangsa, kebutuhen penghargan arah pasu-pasu siibereken Dibata erkiteken kepatuhen bangsa e (“ipehagaNa...” ayat 4) janah siterakhir eme kebutuhen aktualisasi diri erkiteken iatanken Dibata dengan bangsa e nembah ras muji gelarna arah budayana (ayat 3).

            Tentuna kengasupen bangsa Israel i bas ia “Landek dingen rende alu dem pengataken bujur” (bnd. Tema), enda lit latar belakangna. Dinamika kegeluhen kinitiken bangsa enda memang labo mulus-mulus saja. I bas piga-piga paksa lit masana bangsa Israel terpuruk i bas kiniteken, bahkan erlawanen ras sura-sura Dibata. Tapi bangsa Israel pe ngidah maka amin gia megati ia ngelakoken hal si la ngena ate Dibata tetap ialo-alo Dibata alu kekelengen bahkan alu mereken kemenangen-kemenangen man bangsa e i bas ngalaken imbang-imbangna. Kengasupenna muji ras nembah Dibata e erkiteken penggejapenna (iman kinitekenna) ngidah alu tangkas maka Dibata si sembahna e eme Dibata si enggo mereken keselamaten, kebutuhen ras kemenangen bas geluhna.

            Kegeluhen kalak si ngaku/sierpengakap maka ia kalak sierkiniteken  i bas jaman genduari enda, ndauh berbeda ras oratenta ndai. Lit piga-piga hal si berbeda si enggo si idah i bas pengoratenta ndai:

1.      Penembahen i bas kemurnin identitas budaya

Bangsa Israel i bas ncidahken ungkapen pengataken bujurna teridah alu ekspresi budayana sendiri.

ð  Enggo nge kita nggejapken carata nembah man Dibata e tuhu-tuhu mewakili perasanta bagepe identitas budayanta (gelah ula kita pekulah-kulah)

2.      Penembahen i bas nggejabken kuasa ras keleng ate Tuhan

Bangsa Israel teridah jelas latar belakangna i bas ia nembah ras muji Tuhan, eme erkiteken kemenangen si ibereken Tuhan.

ð  Enggo nge kita mereken pusuh ras perukurenta nggejapken ras naksiken “kemenangen-kemenangen” si enggo bereken Tuhan bas geluhta?

III. Ogen

            Ceritera  bas ogenta enda eme prosesi paska kemenangen bangsa Israel si ipimpin Daud ngelawan bangsa Pilisti (bindu 5). Lit kebiasan si seri si megati ilakoken bangsa Israel kenca ia ndatken kemenangen, eme alu rende ras landek. Rende ras landek eme bentuk ungkapen keriahen ukur bage pe pengataken bujur erkiteken keberhasilen/kemenganen i bas ngalaken sada hal.

            Bas budaya Karo Landek erkaiten ras adat misalna masuk rumah mbaru, pesta perjabun, simate-mate ras sidebanna. Landek enda erkaiten ras ritus bagepe kiniteken sibiasana ipimpin sekalak guru (dukun). Misalna gendang Mulih-mulih, gendang Tungkat, Erpangir Ku Lau, gendang Baka, gendang Begu Deleng, gendang Muncang, ras sidebanna. Intina pada dasarna budayanta pe i bas megungkapken sada perasan alu rende ras landek.

           

IV. Kesimpulen

            Situhuna rende ras landek enda adi sigargari pe i bas budaya sideban, enda simbol-simbol perasaan, ntah pe luapen perasaan si nehken sada pesan “keinginen guna ngelakoken sada tindaken nyata” sebagai respon i enggo ialokenna. Temata sendah  situhuna pe mereken penekanen si seri ras  si e. Landek ras rende enda jadi sada tekad guna ngelakoken sada hal si lebih dari sekedar landek ras rende e. Eme lagu langkah kegeluhen si sentudu ras sura-sura Tuhan. Jilena landek ras rende e tentuna itentuken dem ntah lang kita nggejabken ras ncidahken pengataken bujurta man Tuhan

---

[1] Perdiateken kata , “Pujilah.., endekenlah meriahlah, landeklah.”

[2] Icidahken i bas: “Ia sinepa kam, ipehagaNa, mereken kemenangen..”